السـلام عليكـم ..

عارفيـن ان الايفـون او الايبود تتش اذا ماكان عليه جيل بريك Jailbreak مايقبل برامج الا عن طريق ابل ستور باستخـدام برنامـج الايتونز .. ولكـن بعض البرامـج أو الالعـاب المـوجـوده ضمن ابل ستـور المدفوعـه .. متوفـره خارج المتجـر Cracked وفريـه .. مير البـلا لاحملتهـا وجيت تسوي لها مزامنـه ببرنامج الايتـونز ماراح تركـب ..

لقراءة المزيد »

بمـا انـي انسـان فلسفـي بطبعـي وكـل ظـاهـره لابـد أدور لهـا تفسيـر مسبب من وراء الـدوافـع وهالـدوافـع على ايـش ترتكـز بالاسـاس والنتيجـه من هذه الدوافـع اللـي تسبب ردة فعـل عكسيـه تكـون طامـه كبـرى في بعـض الحالات ..

تـدوينتـي كلها تتبـلور في قـاع المحيـط السلبـي لردود الفعـل العكسيـه ومثـال على  هالـردود لما تكـون معصـب وتصفـق الباب بشـده يـرتـد عكسيـا الى جبهتـك : ) ( وجـه فيلسوف جاب العيـد )

لقراءة المزيد »

ذات از اينـف .. مثل ماينطقهـا العـرب .. ومعنـاها مثل ماهـو معروف ( كفايـه ) ولكـن المعنى الاوسـع والاشمـل والاجمـل .. ( لايكثـر ) لان لهـا وقـع خاص بالاحسـاس وتأثيـر على بعتض العقـول اللـي مادري وش تحـس بـه واللـي هي محـور تـدوينتـي اليـوم . :roll:

كتبـت هالمـوضـوع قبل مانشئ مـدونـه بأحد المنتـديات .. وغبر وقلت اجـدده للتوعيـه حيث اني اشوف يوميا محـور التدوينـه يتكرر وانا اخاف على نفسـي يصيبنـي عقـده من زود الكبـت بسبب اللـي اشوفـه :lol:

لقراءة المزيد »

السـلام عليكـم ورحمـة اللـه وبركاتـه

مثـل ماعـودتكـم دايمـا على كل مفاجـأت خطيـره . .. اليـوم بحـط طريقـة اضافـة خط تاهوما الخطير الى لينكس وللمتصفحـات اللي تشتغـل ضمن بيئة لينكس حيث ان االاغلـب يعانـي من هالشـي وطبعا بما ان مـدونتي الخط الاساسي فيها تاهـوما واستخدم لينكس بكثـره ابتكرت هالطريقـه ( وجه نصاب ). لقراءة المزيد »

السـلام عليكـم ورحمـة اللـه وبركاتـه

بمـا انـي مالقيت شي ادونـه اليـوم قلـت يابرستيـج مالـك الا تشــد حيلـك وتسـوي شي يستفيـدون منـه احسـن ماتسـوي فيها ظريف على قـل السنـع

تـدوينتي اليـوم تهـدف الى تثقيـف شبابنا المسنجرييـن من محـاولات الاختـراق الـجديده اللي مآذينا فيها البزاريـن هالايـام ..

يوميـا تجـيني ايميـلات ورسايـل اذا مو يوميـا خلنـي اقـول كل يـومين عشـان ماتقـولون يابرستيـج تراك تشلـخ علينا كثير وحنـا نسلـك لـك .. المهم الرسايل ذي عباره عن ناس بثـره يمررونهـا ومحتواها رابـط موقـع على اساس انـه يكشـف لك البلـوك . الوكاد اني عارف وش السالفـه وعشـان اقـول لكم اني انسـان غير ملقـوف وعزيز نفـس ومايهمنـي من صكنـي بلـوك ورجل ذكـي يتمتـع بالبديهـه والحنكـه وسرعـة فهـم المواقـف  . المهـم ان هالـروابط الكثيـر من الاخـوه والاخوات لازالـوا ضحيـتها .

ولكـن مع اسفـي ان الكثيـر من الاخـوه المسنجرييـن اللـه يهديهـم ذابحتهـم اللقافـه ويبـون يعـرفون من اللي صكـهم بلوك بالمسنجـر .. ولكن ابشـركم بما اني خبيـر ماشاء اللـه علي جابتنـي امي عبقـري .. ان للحيـن العلمـاء والمبرمجيـن عجـزوا عن اختـراع اي برنامج او موقع يكشـف ااذا فيه احد صكك بلـوك او لا .

اذا تبـي تعرف اللي حذفـك ترا امرها بسيط من المسنجر نفسـه اما اللي سوا لك بلوك فهذا شي مستحيـل .. انت اللي جالس تقولي تهايط والبلاس اللي يطلعهـا اقولك افلقني لو عطاك نتيجـه صحيـحه

مثل ذاك اليـوم يجيني اخـوي الصغير يقولي كل هالقد ماتحبنـي ع المسنجر ليش صاكنـي بلوك .. اقوله وش السالفـه .. مصور لي صفحة تنظيف جهات الاتصـال حق مسنجر بلاس وطالع له اني صاكـه بلوك وانا واللـه ماسويتها :( .

وبعـدين انتوا ولقافتكـم طيـب اللي حظـرك حظـرك بقريح ياخـي هو ومسنجره وش تبي فيه

او اذا عرفـت فلان صاكك بلـوك يعني وش بيغيـر خلاص لاكتشفـت هالشي بيصير يحبـك ويقولك صكيتك بالغلـط . وش بيقدم أو يأخـر .. او تبي تقـوله انك كافشه على حقيقتـه اسمح لي اقـول لك الرجال ماحظـرك الا انه يبي الفكـه وانت شكلك تتلـزق فيه غصب هههه .. عادي نص اخوياي صاكـهم بلـوك لانهم فاضين سوالف ع المسنجـر ولكن عادي مابيني وبينهـم شي ولا يغير شي .

المهـم طولت عليكم بالهذره الزايـده

مافيـه ياعرب يا أخوي ويا أختي مافيـه اي موقع يطلـع لك اللي صاكك بلـوك واي موقع يجيك يقولك هذا يطلـع لك اللي حاضرينـك .. تراها كذبـه عشان لاحطيت ايميلك وباسووردك تروح الباسوورد للهكر على طبق من تبـن وانت تجلس تقـول تصفق بحالـك .

يعنـي تجيك رسالـه مكتوب فيها موقع يكشف اللي حاظريـنك او برنامج او غيـره انسـى ولاتدخل اي رابـط وتتليقـف تراني نصحتـك

ودايم تسجيل دخولك لايميلك يكون عن طريق مواقع الشركه الرسميـه اللي هي live.com او hotmail.com او msn.com

فلذلـك خلوا عنكـم اللقافـه وهمسه اخويه لكم اخيرا ( لايكثـر )

محبكـم برستيـج

قال الحكماء بالاول : لكل منتدى حكاية .. ولكل حكاية نهاية .. ولكن تبقى الذكريات ممزوجة بنهايات البداية   ( وجه حكيـم متوهـق ) ومن هذا المنطلـق خلنـي اقـول لكـم حكايتنـا اللـي اقردونـي فيها كل من جا قال وش صـار .. وهذي حكايتنـا :

خل اقـول بدايتـي مع المنتـديات من سنـة 2000 تقريبا واذا شطحت زادت سنـه مع بداية دخول الانتـرنـت وكانت وقتها المنتديـات تنعـد ع الاصابـع قليله جـدا وكنت وقتـها مشارك بمنتدى اسمـه فيجوال بيسك للعرب منتدى يختص بالبرمجـه لانه انحلـف علي الا انـي اشارك معاهـم بالمنتـدى وقالـوا تكفى ياخالـد خليك عضو سجل معانا عشـان ينشهر منتدانا ونقهر المنتديات الثانيـه عشانك سجلـت عندنا ولا سجلـت عندهم . :roll:  طبعا هالشي خـدم منتدى فيجوال بيسك للعرب اني تنازلت وسجلـت عنـدهم بما اني شخص احب البساطـه بطبعـي وهذا واضح من تدوينتـي هذي وانا شخص مرح واكره التقيـد والجمـود .. المهـم قبل لانحـرف عن موضوعنـا الاساسـي .. كانـت هذي اول بدايتـي في المنتـديات وكنت مشارك وصاحب مشاريع برمجيـه وافكار خطيـره افادت المبرمجيـن الخطيرين الحيـن وبرمجياتي ذاك الوقـت للحيـن صارت اسس ونظريات للحيـن يرجعون لها < خف علينا .

وجلسـت مشارك فيـه على هالمنـوال واذا جيت استخف بدمي واتميلـح قلبوا ام السالفـه رسميـه لان المنتدى كان مختص .. طفشت من ذا الوضـع ورحت افرفر لين لقيت موقع اسمه سعودي نت الحين تقفل وين طار مادري وكان فيه منتدى فلـه عرضت عليهم مواهبـي اني بسجل عنـدهم ويكسبـوني عضو بينهم وبالفعـل سجلت واستقعـدت لهم على تميلـح وحركات وكانوا وقتها اصغرهم عمره 25 وانا تـوي بزر وسويت فيها اني الكبير معاهم . طبعا مانسـى اذكر ان انسحابـي من منتدى فيجوال بيسك سبب لهم انهيار للموقع وانهيار عصبـي للاداره

جاءت فتـره وتركت المنتـديات وصرت اهتـم فالبرمجـه والتطوير .. ولي برامج على النـت انشهـرت واكواد برمجيه وغيرها ومع كل حاجه كان فيها حقـوق باسمي الى ان سافـرت واتصل فيني ( عبسي ) . وكانت هذي قصة خذ وخل اللي هي محـور تدوينتي هذي اللي مقدمتها كتبتهـا عشان اقـول لكم انـي ظريف وقسم :twisted:

اتصـل وقتها عبسـي يطلـب برنامج لدائرة التربيه او وزارة التربيه فالسعـوديـه وقلت طيب هذي حاجه حلـوه اني اخدم المملكـه بمواهبي واكون شخص اساسي في نشأة المملكـه التعليـم في المملكـه وش البرنامج اللي تبغيـه .. عطاني اشياء تعجيزيه سنـه تقريبا تحتـاج شغل واجتهاد والاخ يتميلـح لي وعلى ترفيـع من اليـوم عشان يقولي بالاخير البرنامج ابيـه بكرا :D

المهـم اني بديت اعمـل فيه وبالفعـل اجتهدت ولفقت له واجهة البرنامج وشوي اكواد عشان العب عليه واقوله اني انجـزت ويوم قربت اخلصه يقولي خلاص غيروا رايهم مادري ايش .. ودامت السالفه كذا على سوالف وعبسي يستخف بدمه كان ظريف الاخ وقتها وانا اقوله يالبى السعوديه بس التم تعيس الحظ على خايب الرجا . ومع المناقشات يقولي انا عندي سيرفر استضافه وحق مواقع ومادري ايش ونبي نسوي منتـدى قلت يلا .. وكانت هذي بداية خذ وخل

ماخفي عليكم كنت وقتها انسان مهايطي بالشات على تميلح ومشاكل ادخل دقيقه الا الباند يصك جبهتي ابتسم وارجع ادخل من جـديد بما اني مدردش اساسي مايستغنون عني اذا طلعت طلعوا كلهـم ..

ويحجز عبسي الدومين حق خذ وخل ويركب المنتدى انا كنت وقتها ماعرف لهالامور بس كنت اعرف اشارك واكتب مواضيع خطيره .. وسجلنا وقتها بحدود 30 عضو وانا مسوي الدعايات بالشات وجبت الشله كلهم ومنهم من صار عضو مؤسس واساسي .. وبدينا على خذ وخل تطوير وغيره عبسي بذيك الفتره انشغل الله لايشغلنا الا بطاعته واستلمت زمام الامور انا على ستايلات واداره وتحكم واشهار واعلانات اذكر وقتها ماكنت اعرف اسوي ستايلات رحت سرقت ستايل مجاني .. ( احسني لازم اعترف بهالشي قبل لاربي ياخذ وداعته ) وشطبت الحقوق وحطيت تصميم عسول بالخط العريض :D لين اكتفش صاحب الستايل اني لاطشـه جا وسوالي زفـه وحذفت الستايل بكبره وصممت من نفسي وخذا معي التركيب 4 ايام بدون نوم ( تركيب بس )

آآآه ياذيك الايام فله كانت يمرون على بالي بعض الاسماء الحين اللي جد لهـم وحشـه .. مرجوج ابو نص مانساه ذا خويي اللي ماديري وين اللـه حاطه للحيـن يحاول يطلع من حالة فهاوته لكن احس ان الامل مفقـود بهالشي والحين هو صاحب موقع ومنتديات ملعب نت الله يوفقه واذكر مفهـي فور ايفر اللي ياما ضحى بنفسه وهو ياخذ باندات بالشات عشان يسوي لنا اعلان .. ونص ريال مشقوق واخوه اللي كان مسوي ثقل واذا بنت مزحت معه يقلبها هوشه .. بنت الامارات وبنت عمها شمعه اللي كانت تقلب الدنيا فوق راسي اذا جيت امزح

اااه وش اذكر بس .. فنيله علاقي اللي كل يوم اشوته وارجعه مع انه كان يكرهني بس كنت احوبه وادلعه سروال علاقي من زود المحبـه .. المهم هذي لقطات من موقع ارشيف لخذ وخل سابقا

قال التسجيل طياره قال اصلا ماكانت تشتغل وكان الزائر يتوهق وهو يسجل فيها وبالاخير يروح على صفحة التسجيل الرسميـه

القرينيه < ياكثر ماكنت اسوي مشاكل معاها وهي مطوعة المنتـدى حاشرتنا بالاهداءات على رسميه اغلب الاوقـات

شوفوني باللقطه هذي بعد نكي كيف كان

حورس اللي هو حاليا ابو علي عنـدنا . الله يجزاه الخير .

صـوره مؤلمـه :(

نكـي يازينـه بالاحمـر بينـهم

مازال هناك امل < اللـي هي بعثرة احرف .. سماح اللي هي مس رومنتك كانت بالاخضـر :90: .. < يقاله غصتـه العبـره

ياكثر ماصار تقلـيد لخذ وخل بذيك الفتـره كلن يحاول يسوي خفيف دم ويسوي نفسـه ولكـن ماغير يفتح منتداه اسبـوع ويقفلـه اكيد لان ماعنده اداره نفس ايدارة عسول < ماتعـوق معه .

طبعا هالفتـره كانت رائعـه بمعنى الكلمـه . ماكان فيه احزاب ولا حقد ولا كراهيـه حتى اذا تهاوشنا نقلبها ضحـك وفلـه وحتى مهما كبرت الهوشه بالاخيـر نهـجد ونضحك وكلن يصور رد ويحطه للذكـرى .. وتابعنا على هالمنـوال لين كبر خذ وخل واشتهـر الى ماقبل 8 شهور من تدوينتـي هذي

رجع عبسي بعـد هالغيـاب يطالب بالمنتـدى وكان له 3 سنين غايبـن عنه وتاركـه وانا مجهتـد فيـه .. تنحت .. لاني تعبـت في الموقع واسسته وسويت شبكـه مو بس منتـدى .. ولكـن النطاق الدومين عنـده ماقدر اتصرف بحاجـه اي وقت يسحبـه عادي ومع الضغـوط بالاخيـر قلت كلـه منتدى ومايفرق بين اخـوان وهو حلالـك ورجع خذ وخل لعبسي .. واستلمـه الحيـن اتمنى له العمـار ..

فهالفتـره بعد مارجع له المنتـدى جلس يجدد عبسي ويغير عضويات ويطـرد وغيره وبعض الاعضـاء احزنهـم هالشي ووقفوا معـاي مانسى وقفتـهم ولا هان علـي اني افرق جمعتـهم فرحـت واسست منتدى جديد اللي تشوفونه الحين ( دجه كافيه ) .

الى هنـا اكتفي بالكتابـه الى قصه جـديـده :mrgreen:  حبيبكم عسول

او برستيـج نكي الجديد هناك

حيْن يتعـمْد الآخرينْ فهمك بطريقهْ خآطئةْ..!
, لآترهْق نفسكْ بالتبريرْ ….
…..فقطْ ادر ظهركْ وْ استمتعْ بالحيآه

اعجبتني ونقلتها .

اذا كنت من النـوع اللـي يدخـل في المنـاقشــات بكل انـواعها ادبيه اجتماعيـه علميـه عشـان تستفيـد تبادل خبـره او تفيـد من تناقش معـه اكيـد بيكـون مر عليـك فئـه من النـاس يطبقـون ( خالـف تعـرف ) .. او مثل عنـوان التـدويـنه ..

ناقـش .. واختلـف “ لاتكـن امعـه “ موافـق على كل شيـيء يعنـي معاهـم معاهـم عليهـم عليهـم , من الطبيعـي وجـود مجمـوعه من الآراء المتباينـه في اي نقاش بيـن افـراد ولكـل فـرد الحـق في التعبيـر عن رايـه وواجـب باقي الافـراد احتـرام رايـه, مير البـلا لاجـاك واحـد يكـون رايـه مختلـف فقـط لمجـرد اثبـات وجـود واختـلام وتميـز والبـلا الاعظـم لا كان هـو نفسـه غير مقتنـع برايـه من الاسـاس هذي المشكلـه ..!

امممم ..

انا جالـس اكتب لمـوقف صـار معـي .. وبصراحـه سكتنـي .. جالسين جلسـة شباب ووناسـه ونتناقش باحـد المواضيـع تحـديدا “ سياقـة المرأه للسيـاره “ طبعا هالموضوع حاليـا تركنا كل المـواضيـع وصار حديثنا وحديث الصحـف والمنتـديات وغيـره .. تركنا مواضيع البطالـه والشـذوذ بالجامعـات وغيـرها من المـواضيـع الكثيـره ..

ارجـع لنفس موضوعنـا .. تكلمنا بالمـوضـوع عادي ومعنا واحد من الشبـاب متشـدد شـوي ومسوي فيها الحمـش وكان مؤيـد للمـوضوع عـادي ..

تبـون رأيي انا ؟ انا معارض الا في حال الضـروره القصـوى وللضـروره أحكـام .. يعنـي مو البنـت تركب سيارتها تـروح خويتها تروح سـوق .. الخ .. الضروره القصـوى في حال عدم وجـود اخ او سائق او اب يقدر يسوق او عـم او خال .. وحاله طارئه جات مثل مـرض لاحد الاهـل او غيـره وبعد المسافه وعدم توفر مواصلات او غيـرها ..

طبعـا اخونا في اللـه هذا دايم صـوته اعلى صـوت ويقاطع بالحـديث ونسلـك له ونسكـت لان دايـم يحب يكـون هو اللي يسولف صوتـه مرتفـع .. وكان مؤيـد للمـوضـوع وعادي معتبـره وهو متشـدد.. ولكـن لازم ينـافـخ ويثبت وجـوده ويكـون سيد النقـاش .. الى ان سـألته تخلي اختـك تسـوق ..؟ تلعثـم وقال لا مستحيـل ..

طيب كيف مستحيـل وانت تـوك تأيـد .. وكان بيقلـب النقـاش هـوشـه .. فلذلك لاتنافـخ عشان تثبـت وجـودك.. قل خيرا او لتصمت .

تحـدثت عن تجربـه شخصيـه في بعض الاحيـان كنت اخطي واصنـف اللي اتناقش معه من فئة “ انا انافخ اذا انا مـوجود “ واتجنـب النقاش معه في المستقبـل مهما كـان .. وحتـى لو صار نقـاش اخلـي وجهـة نظـره الصحيحـه وباخر النقـاش اسكتـه بسؤال بسيط ممكـن يكـون تطبيق عليـه .. دون ماحـرق اعصـابي محاول انـي اغير وجهـة نظـره للصحيـح .. خلـه مقتنـع الـى مايجيـه سؤال مسكـت .

طبعـا مانسـى انه ممكـن يكون الشخص المختلـف معك في الرأي خاطئ بنسبـة 100% يمكـن يكـون له جزء صحيح من كـلامه لذلـك .. استمـع مهما كان حتـى لو كان نقاش ساخـن وجـو متوتـر ..

بالاخيـر لاتاخذ الامـور على محمل شخصـي الاختـلاف مهما كان لاينقـص في أي حال من الاحوال احتـرامك مثل الاخ المـذكور بالتـدويـنه لازم اروح ابـوس راسه وارضيـه لاني عارضـت رايه وسكتـه ! .. فلذلك ياعـزيزي اعـرف متى تنسحـب من المناقشـه اذا تطـورت لجدال عقيـم ممكـن يؤدي لزعـل .. ويصير مضيعـة وقت ترا وقتـك انت اولـى بـه .. والانسحـاب في هالحـال افضل لـك ولغيـرك .

لقراءة المزيد »

اتفاجئ اني اصحـى من نـومي اليوم واشوف المسجـات على جوالـي من بينها مسـج بايـخ يقـول “ هاه وش جهـزت للفالننتايـن ياولـد “ .. اقلب براسـي فالنتايـن سامعها .. ايـه ايه ذا المـرض اللـي يسمـونه عيـد الحـب .. يافرحتـي بس .. قلـت اللـه يخلـف عليـك وديليت للرسالـه ..

صارت آفـه موضـة الفالنتايـن .. من بعض الصـور بالفالنتايـن .. “ تعالـي باكر بلبس التيشيـرت الاحمـر اللي شريتـه لك هذاك اليـوم وجيبي معك ورده حمـرااء”

اسـواق الملابـس تعلـق الملابس اللي فاللـون الاحمر ع الواجهـات ( وترفع السعر)

محلات الهـدايا تعلـق الهدايا باللـون الاحمر ع الواجهـات ( وترفع السعـر )

محـلات الزهور ( قيمة الـوردة تصير ضعفيـن قيمتها باقي ايام السنـه )

حتـى الشياب ! تخيلـوا لو قلت لكم شايـب لو نفخـت عليـه يطيـح .. احتفـل وجاب للعجـوز زوجتـه ورده حمـراء ومسـوي عيـد .. الله يخلف عليك وش ماخذ من دنياك انـت

السيارات يصبغـونها احمـر .. اللبـس كل شي احمـر بأحمر حتى الجوالات يبـدلون الكوفر ويسـوونه احمـر .. ياربي على هالمـرض ..

اتقـوا اللـه في انفسكـم .. مع هالفسـاد وموالات النصارى .. " يا أيها الذين آمنوا لا تتخذوا عَدُوّي وعدوَّكم أوْلياءَ تُلْقون إليهمْ بالمودَّة وقد كفروا بما جاءكم منَ الحقِّ"

يجـي واحد ومسـوي فيها ويقـول طيب وش الغلـط اذا اهديـت اللي احبـه ورده حمـراء فهاليـوم ؟

الحـب ماهو فـي يـوم .. ولا ضيـاع وتقلـيد اعمى للنصارى .. اهـديتـه ورده تحبـه .. وصانا الرسول عليه الصـلاة والسـلام ان “ تهادوا تحابـوا “ وهذا هو ود الرحمـن يهبـه للمسلميـن “ وجعلنا بينكم مودة ورحمـة “ ولكـن دون اتبـاعـهم والتقيـد بعاداتهـم وغزوهـم لافكارنا.

طيـب ..

اصل عيد الحب

تقريبا الكـل عارفين ان فالنتـاين شخص نصـاري وهاليـوم تسمى باسمـه وصاروا يحيـون ذكراه فيذا اليـوم من السنـه وهذي قصـته بالتفصيـل .

عيد الحب فالنتايـن من اعياد الرومـان الوثنيـن حيث ان الوثنيـه كانت عند الرومان قبل مايزيد على 17 قـرن .. وهو تعبير في المفهـوم الوثني الروماني عن الحب الالهـي ولهذا العيد الوثني اساطير عند الرومـان واستمرت عند ورثتـهم من النصارى .

جا في الموسوعات عن هاليـوم ان الرومان كانوا يحتفلـون بعيد يسمونه ( لوبركيليا ) في 15 فبراير من كل سنـه وفيه عادات وطقـوس وثنيـه حيث انهم كانوا يقدمون القرابيـن لالهتـهم المزعمه عشان تحمي مراعيهم من الذياب ، وكان هذا اليوم يوافق عندهم عطلة الربيع حيث ان حسابهم للشهور كان يختلف عن الحساب الموجود الحين ولكن حدث لهم ماغير هذا اليوم وصار 14 فبراير في روما في القرن الثالث الميـلادي .

وبهذي الفتره كان الدين النصراني في بداية نشأته وكان وقتها يحكم الامبراطوريه الرومنانيه الامبراطور كلاديس الثاني وهو حرم الزواج على الجنود عشان يخلي فيهم مروتهم ومايشغلهم عن الحروب :D < امحق راي وش يسوون المساكين وقتها .. المهم ان القديس حقهم ( فالنتاين ) ركب راسـه وتنح وتصدى لذا الحكم وكان يسوي عقود الزواج للناس بالسر ولكنه انفضح وحكموه اعدام . وماتاب ابن اللذينا بالسجن حب بنت السجـان وكان هذا بالسر حيث انه كان يحرم على القساوسه والرهبان في شريعة النصارى الزواج وتكوين العلاقات العاطفيه .. وشفع له عند النصارى ثباته على النصراينه حيث عرض عليه الامبارطور ان يعفو عنه على انه يترك النصرانية ليعبد الهة الرومان ويكون مقرب له ويخليه صهره . لكن التنبـل رفض العرض وتمسك بنصرانيته ونفذو فيه حكم الاعدام في يوم 14 فبراير 270 ميلادي .. ليلة 15 فبراير ( عيد لوبركيليا ) ، ومن يومها اطلق عليه لقب قديس .

وبعد سنين لما انتشرت النصرانيه في اوروبا وصارت السياده لها تغيرت عطلة الربيع وصار العيد في 14 فبراير اسمه عيد القديس فالنتاين لاحياء ذكراه لانه فدى النصرانيه بروحه وقام برعاية المحبين .. وصار من طقوس ذاك اليوم تبادل الورد الاحمر وبطاقات صور كيوبيد ( طفل له جناحين ) يحمل قوس ونشاب وهو اله الحب عند الرومان اللي كانوا يعبدونه من دون الله .

وهذا الله يسلمكم النصراني فالنتاين اللي شبابنا اليوم يحتلفون بعيـده ..

فتوى الشيخ عبد الله بن جبرين في الاحتفال بهذا اليوم
سئل فضيلته: انتشر بين فتياننا وفتياتنا الاحتفال بما يسمى عيد الحب (يوم فالنتاين)وهو اسم قسيس يعظمه النصارى يحتفلون به كل عام في 14 فبراير، ويتبادلون فيه الهدايا والورود الحمراء، ويرتدون الملابس الحمراء، فما حكم الاحتفال به أو تبادل الهدايا في ذلك اليوم وإظهار ذلك العيد جزاكم الله خيرًا.
فأجاب حفظه الله:
أولاً: لا يجوز الاحتفال بمثل هذه الأعياد المبتدعة؛ لأنه بدعة محدثة لا أصل لها في الشرع فتدخل في حديث عائشة رضي الله عنها أن النبي صلى الله عليه وسلم قال:(من أحدث في أمرنا هذا ما ليس منه فهو رد) أي مردود على من أحدثه.
ثانياً: أن فيها مشابهة للكفار وتقليدًا لهم في تعظيم ما يعظمونه واحترام أعيادهم ومناسباتهم وتشبهًا بهم فيما هو من ديانتهم وفي الحديث: (من تشبه بقوم فهو منهم).
ثالثاً: ما يترتب على ذلك من المفاسد والمحاذير كاللهو واللعب والغناء والزمر والأشر والبطر والسفور والتبرج واختلاط الرجال بالنساء أو بروز النساء أمام غير المحارم ونحو ذلك من المحرمات، أو ما هو وسيلة إلى الفواحش ومقدماتها، ولا يبرر ذلك ما يعلل به من التسلية والترفيه وما يزعمونه من التحفظ فإن ذلك غير صحيح، فعلى من نصح نفسه أن يبتعد عن الآثام ووسائلها.
وقال حفظه الله:
وعلى هذا لا يجوز بيع هذه الهدايا والورود إذا عرف أن المشتري يحتفل بتلك الأعياد أو يهديها أو يعظم بها تلك الأيام حتى لا يكون البائع مشاركًا لمن يعمل بهذه البدعة والله أعلم.

..

فالنهايـه الله يديمنا على التحاب في طاعتـه ..