بسم الله الرحمن الرحيم .. والصلاة والسلام على نبيه الكريم  وعلى آله وصحبه أجمعين .. أما بعد .. ادري يا أخوان اني غثيتكـم بذي اليـوميـن مكثـر تدوينـات وكل تدوينـه بقصـه خطيـره لي بس كلـها حكـم وعبــر اكيـد وش اسـوي دامنـي مبـدع

المهـم بونجـور شلـه مع هالصبـاح الجميـل والمطـر والبـرد وانا متقربـط بفروتـي وجالس فالعمـل .. افكـر بتدوينـه مير مع البرد قدرتي على الادراك والابتكـار تخـف ..

الا يجينـي رجال ويجر معـه بزورته 3 اكبـرهم اتوقع عمـره بالـ 10 سنيـن واضـح عليهم عيال نعمـه .. قلت يلا جات الرزقـه اطلع اليوميـه واقفل محلي وارجع اتلحـف وانام .

دخل الرجال تلفـت وسأل عن ايفـون + ايبـاد .. قلت مـوجود فـ بدا بعيالـه من اكبـرهم انت وش تبغـى قال ابغـى اثنيـن ايفون وايباد ناظرت البزر بطرف عيـن .. قلت اي والله يحق لـك .. قال ايه يبه وابغى ايبود الصغيـر قاله الوالد ابشـر .. والثانـي نفس الطلبـات اشمعنى اخوه  جا دور الصغيـر اللي مايعرف ينطق كلمتيـن توقعـت يطلب له مصاصه نفس الشي يبغى ايبود الكبير على قوله ( يقصد ايباد ) وايفـون .. جهـزت لـه الطلب والمشكلـه على حظ الصغير ايفـون 4 مابقـى الا فيه 3GS موديل اقـدم .. ماعجبـه البزر يبغـى 4 ..! وانا ودي ادق راسـه ابي اصرف الثري جي اللـي عندي خله يشيله يمال العنقـز .. خذا اغراضـه وسألهم ان كان يبغـون شي بعـد قالوا لا .. قلت يازيـن الدلال

بعـدها بسـاعه تقريبـا جاني رجال ثانـي اعرفـه .. وسألني عن ايبـود ولكن هالرجال اعرفـه حالته على قـده ومستـور .. وقالي من شوي جاك رجال وشرا لعياله كذا وكذا .. قلت ايـه قال هذا خال عيـالـي وعيالي حشـروني يبـون نفس عيال خالـهم .. قلت بنفسـي اللـه يعينـك اجل .. ومشيت حاله بايبودات عاديه على قد الحال

فـ الموقف الاول ابو 3 بزاريـن وش حاجتهـم كل واحد ياخذ له 3 من اغلـى القطـع التقنيـه وكان بالامكان مثلا ان ايباد واحد يأدي الغرض للثـلاثـه .. او وش حاجتهـم بالايفون وحنا رجاجيـل طول وعرض مانشيل جوال ابو لمبـه .

بنفس الوقـت لهذي المواقف اعـلاه جالس عنـدي صديق قديم حتـى من ايام الطفـولـه فلما خلصـت حاجتي مع الرجال ناظـرني وابتسـم .. قلـت له تذكر طفولتنـا ؟ ضحـك

سألـتـه قـد سويـت لك سياره بأسلاك ؟ قال اي واللـه .. هذا الاختـراع ايام الطفولـه كان شي كنا نجيب اسلاك المنيـوم نربطهـا ونصنـع سياره صغيـره ونعلـق لها ذراع عشان نمشيـها ونفرفر فيها بالحاره ( حفاة القدمين ) . او نروح اي بنشـر ناخذ منـه عجلات سياره قديمـه عشان نلعب فيها ندفها قدامنا بالشـوارع انواع المتعـه

اذكـر كنت صف خامس ابتـدائي لما تهـورت وطلبت سيكل من ابـوي اللـه يحفظـه وطلبتـه وحسيتني طالب راس كليـب طلبتها برعب .. وسنتيـن وانا اكـد بالمزرعـه بذاك الوقـت وكلي براءة الطفولـه اشتغـل معـه ويعطيني مصروفي واجمعـه عشـان يجيب لي السيكـل واكشـخ فيهـا كأني راكب بورش وقتـها.. هذا ليس نوع من الحرمـان او الشـده بالعكس ماكان يبخل بشـي ولكـن كان يعودنـي اعتمد على نفـسي فالصغيره والكبيـره..

تدوينتـي عن الدلال المفـرط للاطفـال .. بـدون ما أتطرق لطفـولتي اللي مالهـا داعـي اكمل تدوينتـي عن الدلال المفـرط وسلبياتـه وايجابياتـه ..

اعتقـد البعض الحيـن بيقولي طفولتكـم غير عن طفولـة هالوقـت كل شي تغيـر .. معاكـم فهالنقطـه ان كل شي تغير وهالوقـت صار غير وقتنا السابـق … الآن حنـا في وقـت غطـى عليه ثقافـة الاستـهلاك وبعض اللامبـالاه واصبح كل شي متوفـر وبكـثـره ولكن بنفس الوقـت اصبحـت تربيـة الاولاد عمليـه شاقـه جـدا اذا كان ولي الامر مهتـم في التربيـه لانشـاء جيل واعـي مسئول بعيـد عن الاستهتـار واللامبالاه

صارت عمليـة الموازنـه مابين دلال الاطفـال وتربيتهـم والشد او الليـن معادلـه صعبـه لاي اب أو ام يهتـم بتنشئة اولاده النشئه الصحيـحه بعيدا عن الجالب السلبي للطفل وهو الاتكاليـه وعدم الحس بالمسئوليه عند نضجـه .

الكثيـر منا في عصرنا الحاضـر يفرطـون في دلال اطفالهـم وطبعا هذي محبـه مانختلـف عليهـا ولكـن هذا ينعكس سلبيا بانشاء شاب مستهتـر غير متحمل لاي مسئوليـه اعتمادي درجـه أولى . بوجهـة نظري انا ماعتبر الامر محبـه لاطفالهـم فقـط ولا عطـاء زايد او كثـرة خير .. بنفس الوقـت هذا اهمال من الاهـل وطبعا اذا سألت اي احـد ليش تدلل عيالك بهالطريقـه اكيـد بيجاوبـك ان ودي فيهـم يكونوا اميـز من غيرهـم وابيهم غير عن طفولتنا . فتلقاه يفرط كثير في اعطاءه الافضـل وبالتالـي تلقـى الطفل صار في طلب متزايـد لامـور تكميليـه غير ضروريه ( مالها داعي ) وتعـود علـى كثرة الطلب ويميل الطفـل في هالحال الى التبطـر والتفكير في شيء جـديد لايحتاجـه ولكـن بما انه يتـم تلبيتـه من الاهـل بيطلبـه بدون حس بمسئوليـه بأن هالطلبـات كلها تثقل على كاهل الاهـل لتأمينهـا له . من جانب سلبـي آخر فان هالشي يأثـر على طمـوح الطفـل واجتهاده ويزيد اعتماده على أهلـه .. فمثلا طفـل يطمـح انه ينجـح في مرحلـه دراسيه وبتوفـق عشـان االاهل يلبـون لـه حاجـه .. وطفل اخر تجيـه الحاجـات بدون اجتهاد وبدون اي طمـوح وهالشـي يسبب عنـده لامبالاه ان كان فيه نجاح او لا طالما أن كل مايتمنـاه يجيـه .

ومن جانب سلبـي آخر لدلال الاطفال الزائـد بأن الطفـل ينشـأ بدون ان يميـل لاي شخـص اخر دون اهلـه لانهـم اشبعـوا له كل حاجاتـه وبالتالـي خلق الانطـواء والوحـده لدى الطفـل.. وايضـا لايملـك حس الاداره ولن يكـون قادرا على ادارة اي شيء بما انـه شخص اعتمادي اتكالـي . وايضا قد ينشأ الطفل الي نسميـه بلهجتنا العاميـه ( دلوع أمه ) .

يعتقـد بعض اوليـاء الامـور ان هذا الشيء عادي طالما ( الخير موجود ) وبكثـره .. لاتبخـل على عيالـك ولكـن بحـدود المعقـول فلمذا الدلال الزائد عن حـده وبدون أي داعـي مثل ماذكرت بأول التدوينـه .

أحاول اختصر تدوينتـي وولو ان هالموضوع ودي اطول الهـرج فيـه ولكن فالسطور الاخيـره بقـول انـي ماني معارض لفكـرة الدلال .. دلل اولادك ولاتحـرمهـم فالحرمـان بعـد له جانب سلبـي بأن الطفل ينشـأ على العنـف لتلبيـة حاجاتـه واحيان توصل للصـراخ بوجه الاهـل وبعض الحالات توصل لعقـده في الطفـل

وبنفس الوقـت دللهـم ولكـن اعتـدل .. دللهم على قد الحال ولبـي لهم المتطلبات الضـروريـه وليست الحاجات التكميليـه اللي نهايتها اصـلا الاهمـال عند الاطفال او الرمي او الكسـر

فـ خير الامور اوسطهـا وانا مع الدلال الغير مفـرط والعطف والحنـان والبعد كل البعـد عن حرمـان الاطفـال او القسوه والشـده . او الضـرب واذا احتجـت للعقـاب فهنـاك اساليب عقاب عاديـه كـأن تحرمـه من النـت او الخـروج للترفيـه لايام قليلـه ولكـن مع العطف عليه بنفس الفتـره .

اتمنـى لكم التوفيـق جميعـا .