ياهـلا بالكـل واعتـذر عن انقـطاعـي الدايـم علمكـم عاد تـدرون بـي جـدا مهـم وبسنـز ومالومكـم لو مليتـوا من بثارتـي وكثـر اعذاري خاصـه اللي يقـول وينـك ولا اللـي اسحب عليه ع المسنجر يسدح سلام اليـوم ارد عليه بالمحادثـه بعـد 24 ساعـه

ابشركم رجعـت لـ مدونتي الجميلـه الحيـن ولكـن ماعنـدي سالفـه .. قلت اكتـب من شريط الذكريـات بس قلت لازم التنويـع عشان لايصير الواحـد ماصـل .. المهـم بكتب عن شي صار لـي اليـوم وعن شخصيـه من جمبـها .. انسـان مادري وش يبـي من حياتـه .. ولكـن هالانسـان هذا اللـي بكتب عنـه الاشهـر في زمانـه في مجتمعـي .. شخـص اشهر من نار على علـم زي مايقـول المثـل ماكان يمـر يـوم الا نسمـع فـلان سوا مشكلـه وفلان ضرب له درزن شباب وكسـرهم وفـلان تهاوش مع الشرطـه وسرق ونهـب ونصـب .. الخ من هالمغـامرات اللـي تسـود الوجـه .. هالانسـان هذا بصراحـه بما اني انسان رقيـق وبرستيـج كنت اخاف منـه حتى اخاف اسلـم عليـه لايفرشني بالشارع وانا جـدا مسالـم وبريء

اللـي صار وانا جالـس اطقطق بـ ايفـوني مـره افتح برامج المحادثات وهالسوالف المالغـه القى القائمـه هي نفسها ماتجـددت اقول ماوراهم شي كل مادخلت القاهـم اون لايـن شوي وينشب لي واحد يتميلـح وين انـت وانا الحيـن جالس اسوق على سرعة مادري كم مسوي فيهـا ولد النعمـه ويهايـط وانا لحالي منطـم ورا المكتب منكرف فالعمـل .. اترك الايفـون وادرعـم للكمبيوتر القـى 16 محادثـه نسيت اني ساحب عليهم افتح اشوف وش كتبـوا من جـديد اسجل حضوري بمحادثاتـهم با باتسامـة تسليـك وارجع اصغرها واسحـب .. ياليل الملل بص :(

الا ويطب علي ذاك الشخص اللـي تو اقول لكم عنـه مسوي جاي يسوي لي زياره .. مدرعـم من بعيـد يمشـي عليه عرض كتـوف حسيتـه كتيبـه مو شخص واحد .. مو سمنـه بس ضخامـه ماشاء الله عليـه .. يجيني مبتسـم يقاله انه صقيقـي يافرحتي بـه يقولي هلا يابو خلـود شلـونك ياللي ماتسـأل .. اقول بنفسي تكفـى بس ياصقيق طفولتي الوحيـد عشان اسأل عنك انـت

مد يده بيصافحنـي وياليتـه مامدها تصدقون جالس اكتب باليسار بس لان يدي اليميـن احس جاها شي يـوم انه صافحنـي حشى حسيـت اني حاط يدي بملزمـه وصاكن عليها ( الملزمـه = اداة عند الحداديـن يثبـتون فيها الحـديد عشان يطرقونه ) مالقيت انسب من هالتشبيـه عشان اوصف لكم عـزم يـده

المهـم انا مع كثر هرجي وبثارتـي حسيتني استحي وهو قاعـد عندي .. مره اقوله اخبارك .. وبعد شوي يقولي اي كيف شغلـك وارجع اقوله كيف ايامك ونص ساعـه وحنا على تبادل رسميـات ومجاملات زمان عنك وزمان عنـك .. الاخ طفـش مني لقى له حاجه يسلـي نفسـه فيها خذا الجريـده من قدامي بكل أدب .. يقولي بعـد اذنك بس بطقطق بالكلمات المتقاطعـه .. قلت خذ راحتـك .. واقـول بنفسـي تكفـى يا انشتـاين انت تبي تحل كلمات متقاطعـه افلقني لو تعرف الخمسه من الطمسـه < لاحد يسألني وشهـي

خذا الجريده وانا فاقـد الامل كنت اقول هذا العربجـي الداشر ابو المشاكل يحـل كلمات متقاطعـه ايه هين لو ماقضب الجريده بالمقلـوب اصـلا .

واحد منكم لو بيحل كلمات متقاطعـه ولو كان ذكي وفطين مثلـي طبعا مافيه اذكى مني عشان اقول كم يحتاج وقـت ؟ طبعا وقت طويل ويمكن يستعيـن بمنقذنا قوقل او ينشب لامه ولا ابـوه ويسألهم بعض الاسئلـه ..

هنا جاتنـي الصدمـه واحسني فشلـت نفسي يوم انه ماعدت 5 دقايق بس ( خمسـه ) عشان لاحد يحسب خربطت بالرقـم .. الا وهو يناولني الجريـده ومنهي الاسئلـه ومطلـع الكلمـه المفقـوده .. سويت فيها الثقيل اللـي عادي قلت له كفـو .. رفع تكلفه بس .. وحطيت الجريـده على جمب وانا اقول اكيـد حالها غلط او كان يستهبل ويخربط اي حاجـه

بعـد هالعلـوم كلها وشافنـي ماعطيته وجـه شرب القهـوه حقتـه وانا احس ان عنـده كلام بس مستحـي مني لاني هيبـه وشسمـه .. قام عاد سحب نفسـه بيطلـع حسيت ردت لي الـروح اخيرا بيروح . قبل لايجيب لي الشبهـه ..

راح هـو وانا قلت اناظر الجريده واشـوف وش سوا .. بديت اقرا الاسئلـه حق الكلمات قبل لاشوف حلـها .. واحاول احلها انا من نفسـي من دون لاشوف شـي .. اسئلـه صعبه وقسـم حليت اثنين منهـم يمكن او ثلاثـه وواحد منهم طلع غلط بعدين والباقي ماعرفتـه مع كثرة ذكائي ودهائـي لكـن حسيتني لوح قدام هالأسئلـه .. بس معذور ترا لان كنت مشغل مخـي بأمور اكبر من كذا كنت افكر بحاجات مهمـه واولويـه < عاش مصرف .

رجعـت اقرا السؤال واشوف اجابتـه وافتـح قوقل ادور على السؤال واطابق وتطلـع الاجابـه اللي هو كاتبها صحيحـه .. الاول قلت صدفه والثاني يمكن جا معـه صدفـه .. الين خلصت كل الاسئلـه ولقيته كلها مجاوب عليها صـح بدون تفكير وبدون شي !

ياماشاء اللـه عليـه على كثر ماهـو صايـع على كثر ماهـو مثقـف ! وذكي .. يعني اسأله ماتخطر على البال كان يجاوبها بدون تفكيـر .. استغربت من هالشي طيب ليش هو الحيـن ماله علاقـه فالحياه وانسان منتهي الصلاحيـه وضايـع

سألت واحـد من اقاربـه عنـه .. وقلـت له فلان اللي يقربـك .. قالي تدري هذا كان الاول بدراستـه وكان من الـرواد وكان معروف بذكاءه وفطنتـه .

قلت طيب والسـبب اللي خلاه يدشر هوايـه يعني .. قال ابـوه ! قلت وكيـف .. قال هو الكبير عنـد ابوه وفيه اخ اصغر منـه لكـن ابـوه كان يميز ويبدي اللي اصغر منـه كان يهتم بالصغير ويدلعـه كأن هذا الكبير مو موجود ولا كان يعتـرف فيـه ولا يعطيـه اي اهتـمام لدرجـة انه جاء يـوم وتبرا الاب من ولـده . وهذا السبب اللي خلاه ينحرف هالانحـراف ..!

فـ بعـد هالسالفـه الطويلـه ذي اللـي بقـوله : بتربـون اولادكم بهالطريقـه ؟! وينشـأون مثل هالشخـص ! انا مالـومـه لو انحرف الـوم التربيـه والتمييـز اللـي حصـل له .